نبع الحنان ...
قصة بالعامية
بقلم/ يحيي بزور
الحلقة السابعة عشر ...
-------------------------------
انفجار كوي كبير هز المنطقة عنا كان الاجتياح داخل يومو الخامس والمعارك عم بتشتد والمكاومين كل ضربة وضربة بعطوها للجيش بتخليهم يفكدو عكولهم، بعد صوت الانفجار كان صوت تكبيرات وتهليل اعرفنا انو كمين وفعلا كان كمين محكم وكوي الشباب استدرجو كوة اسرائيلية داخل بيت وفجروه فيهم واللي طلع طيب من الانفجار منهم كان يموت برصاص الشباب الناس ارتفعت معنوياتهم بزيادة رغم الدمار والكصف، حكيت لمريم هاتي احكي لشوف كالتلي انا وصاحبتي مجد بتعرفها حكيتلها اه كالت كنا مروحين من الجامعه وبالصدفة واحنا بالساحة سمعنا شباب اثنين بحكو مع بعض وسمعت كلمة بالعبري ما فهمنا شي هون انا خفت وكلت معكول يكونو جواسيس او وحدات خاصة عملنا حالنا ما سمعنا شي وكملنا وكلت بدي راقبهم ما بعرف كيف اجتني كوة هالقلب، فصارت فرصة منيحة انو نعرف اسماء هالشباب كلت لمجد احكي انك نسيتي كتاب او اي شي وبدك ترجعي تجيبيه، كالت طيب بس بدنا نمر من جنبهم وحاولي اعرفي اي شي اسم مكان اي شي وفعلا عملنا مثل ما حكينا ومرينا بس واحد منهم سمعنا كلام وتلطيش وما سكتنا وشكينا عليهم وخلصت القصة بس هاي كانت فرصة نعرف اساميهم وكلت لمجد كيف بدنا نتاكد حكتلي ولا يهمك اخوي عسكري وهو بتصرف فعلا صار مثل ما حكينا بعد اكم يوم رنت مجد علي وكالتلي تعالي نشرب فنحان كهوة ...
رحت دقيت الباب فتت الا واحد واخوها كاعدين انا نكزت شوي بس كويت قلبي وكعدت حكالي يا بنتي احنا عرفنا مين هذول الشباب هذول عملاء وعمستوى وانتي ومجد خدمتونا خدمة كبيرة وتأكدو انو حمايتكم واجبنا وما تخافو كلتلو انا بخفش الا من ربنا وربنا الحامي واحنا عملنا واجبنا حكالي الله محي البطن اللي حملك والله انك اخت رجال وفعلا ظلينا هيك لانمسكت الشبكة اللي حكو عنها بتتذكر
انا صافن ويلي بدي اضحك ولا الطم ولا اخاف مش عارف مهما البنت الفلسطينية عملت وخدمة وطنها بس صعب انو جندي نجس يمسكها او يلمسها ويعتقلها وهذول بعرفوش لا دين ولا شي !!!!
حكيتيلها كملي كالت ومن يومها هاي مهمتنا كلتلها وقصي بتعرفيه كالتلي اه لما مجد حكتني وكالتلي تعالي عندي كان اخوها واللي معها ماخدين هذول الشبين وكان في شب ثالث واكف معهم اللي هو قصي
طبعا تعرفنا عالعملاء وحكينا اه هما هذول طبعا حكينا بالاشارة عشان ما يعرفو مين اللي موجود وهاي كل حكايتنا كلتلها حد بعرف غير اللي موجودين بالكصة هاي كالتلي لأ ....كربت عليها بست راسها وحكيتلها انا بفتخر انو الي اخت مثلك بس انتي بتظلي بنت وانتي شايفه الكلاب بفرقوش بين بنت وشب ان كان بالقتل او الاعتقال واذا انتي او فاطمة او اي بنت فلسطينية بتنمس منها شعرة بحرك الارض واليابس
كالتلي الله الحامي ولا يهمك خليني كوم اعمل كهوة واحكيلي اخر اخبارك انت وضحى ...
طلت امي وحكت شو بعدك كاعد اه يما شو بدنا نعمل هينا تعي اكعدي كالت لا بدي اروح حضر الغدا، اجت مريم ونادت عفطوم تعي اشربي كهوة، كملت عراسي وانا بدي طفشها باي وسيلة عشان احكي مع ضحى، طلعلولي الثنتين صارو يمزحو ويتهبلو كالعادة وبنشرب كهوة رن التلفون اتطلعت فيهن يا الله زحلكن من هون بدي احكي كالن وما حضرتك تزحلك انت، اما شغلة صحيح ....
طيب ماشي اخرتكم توكعو ماشي، خبطتهم المخدة ورحت احكي طبعا بنحكي عع بعض وجو رومانسي حوالينا، كصف طيران ورصاص ودبابات وعادي مبسوطين ....
يتبع ....
نبع الحنان ...
قصة بالعامية
بقلم/ يحيي بزور
الحلقة الثامنة عشر ...
-----------------------------
اليهود جنو فكدو عكولهم بعد كمين المقاومة ١٤ قتيل فرقة كاملة تم ابادتها اول الاجتياح كان الكصف والاشتباكات تستهدف بس مواقع المقاومة بس هاد الكمين اتخذو قرار انو كل شي حي بالمخيم مستهدف بيوت مراكز صحية خزانات وآبار المي ومواقع تخزين التموين والاوضاع صارت صعبة والتموين خف كثير والاصابات عم بتزيد لانو مركز الاسعاف الوحيد اللي جهزتو المقاومة بطل يستوعب اصابات واغلبها خطير وغير جثث الشهداء اللي كانت بالشوارع وما حد كادر يسحبها بسبب القناصة وبنفس الوكت شباب المقاومة بلشو يكلو منهم استشهد ومنهم انصاب وما كان كادر يحمل سلاح واللي ظل منهم قادر يقاتل ذخيرتهم خفت ....
باسل بامي .... شو وضع التموين عنا كالتلي ما بخبي عليك بلش يخف وعم حاول اكتصد كد ما بقدر غير انو المية كمان عم بتقل كلتلها الله يهونها اللي بصير عالناس بصير علينا، تلفوني برن كانت حماتي رديت بتحكيلي الكصف علينا وكل اللي بالعمارة يا رحلو يا انصابو واحنا مش عارفين نطلع غير انو بطل فيه اكل ولا مي حكيتلها كلكم بخير عمي وضحى، كالتلي بخير كلتلها مشوار الطريق بكون عندك نديت عفاطمة البسي وتعي معي بدك تساعديني نجيب بيت عمي عنا صار كصف عليهم فعلا لبست وطلعنا كان مشهد رهيب بيوت مدمرة وشهدا عجناب الشوارع وما في شي مسيطر عالجو الا رائحة الدمار والدم
وصلنا حكيت يا الله اطلعو فاطمة ساعدي ضحى وامها وانا بساعد عمي ونزلنا وصلنا مدخل العمارة سمعت صوت طيارة حكيتلهم احمو حالكم في كصف فتنا بسرعه واحتمينا وفعلا وكع الصاروخ من كثر قوتو اهتزت الارض انصبت برجلي بس كانت خفيفة المهم كنت بقدر امشي وطلعنا عالطريك لاقونا 4 شباب ملثمين وواحد منهم كان قصي ركضو علينا بسرعه، قصي حكى انتو بخير صابكم شي راح نساعدكم كلتلو بنكدر اندبر حالنا انتو اختفو من هون بلاش يرجعو يكصفوكم بس احكيلي شو الوضع جوا المخيم وكيف طلعتو حكالي الوضع سيئ جيدا والي ظلو من المقاومين اكم واحد واحنا تحاصرنا ونكدرنا ننسحب في محل كريب هون مواد تموينية كنا بدنا اي شي ونمشي حال اكم عيلة محاصرة جوا بس للاسف لكينا مدمر وبنحاول نرجع جوا المخيم، كلتلو احنا كربنا خلص انتو انسحبو وانتبهو عحالكم الله يكويكم وصلنا البيت امي شافتني بهاي الحالة خافت وكانت حالتنا غبرة المهم طمنتها وكلتلها الاصابة خفيفة ما تخافي فاطمة اخدت ضحى عالغرفة هي وعمتي واحنا كعدنا بالصالون كان في راديو ببطاريات فتحت لشوف البلاد شو صار فيها كانت كنيسة المهد محاصرة لانو المقاومين اتحاصرو فيها والوضع عندهم سيئ لانو كان بينهم اصابات وشهداء والرئيس ابو عمار محاصر بالمكاطعة واتخذو قرار بتصفيتو ....
خبر عاجل عملية استشهادية بتل ابيب ٢٠ كتيل واكثر من ١٠٠ اصابة والمنفذ من جنين عملية استشهادية وبتل ابيب ومن جنين وجنين محاصرة واجتياح والطير الطاير بطلعش وبفوت منها هاي كانت اكبر ضربة للامن الصهيوني وخاصة انو هاي الاجتياحات كانت لمنع العمليات الاستشهادية واكيد هس اليهود راح ينجنو بزيادة وراح تصير مذابح ويزيدو كصف يا الله الطف فينا ...
كان خبر العملية بمثابة اكسير حياة رجع الفرحة لكلوب الناس بعد كل هالدمار والكصف كان لازم اليهود يعرفو شغلة انو هاي الارض ما بتوسع لاثنين يا احنا يا هم واذا ظلو راح يبقو بس تحت الارض مو فوكها ...
يتبع .....
ليست هناك تعليقات:
إرسال تعليق