ملتقى شذرات من ذهب

كلام فجوفي ما بغى يخرج
         و  القلب  يا  ما  همّ  شايل
كنت حاسب الحيط اعوج
         طلع الساس هو اللي مايل
بناه جاهل مكفوف اعرج
         ما  كان  على  دارنا  سايل
لما شاف بلاّ العجم خرج
        جانا  يفتي  ف شلا مسايل

اللي بحالو في سيدي فرج
        لكن معانا رجع فكاك وحايل
كل عام  يتسلق في الدرج
        و لو  مرة قضى شي  طايل
وضع  بلادنا بمثالو خمج
        و صار  اللغط  فعديد قبايل
يدو فالطبق بلا ما ينتج
        و يا  ما  خرب  بشلا  عمايل
و عينو ديما على من درج
       حاشي  نيفو  بفضول  سايل

حتى من الضاد اليوم تدرج
       و كل  الافعال  رجعت  فعايل
النص تيدم ببغرير و سفنج
       و عطات ريحة الزيت الحايل
غدا الجهل يركب السرج
       و ترى البغل  فالسربة يتخايل
إمتى يا ناس حالنا يفرج ؟؟
       و نرى  الفساد  من  بلدنا  زايل

                                  يزيد علوي اسماعيلي